د کابل ولایت چهاراسیاب ولسوالۍ اړوند د عزیزخان کلي په یوه ښوونځي کې سلګونو زدهکوونکو ته د (غوټۍ کوچنی ټولګی) تر سرلیک لاندې د ماشومانو لپاره د روغتیا لارښوونې کتابونه په وړیا توګه ووېشل شول. دغه کتاب د ماشومانو د روغتیايي پوهاوي د لوړولو او هغوی ته د روغتیا او حفظالصحې په اړه د ګټورو معلوماتو د وړاندې کولو په موخه چمتو شوی دی.
د ښوونځي ښوونکي د کتابونو د وېش هرکلی کوي او وایي، ماشومانو ته د روغتیايي او علمي کتابونو برابرول د هغوی د پوهاوي په لوړولو کې مهم رول لري او د مطالعې له لارې یې د فکري ودې او زدهکړې بهیر پیاوړی کولای شي.
د ښوونځي زدهکوونکي هم د دغو کتابونو له ترلاسه کولو خوښ دي او وایي، د کتابونو په لوستلو سره به د روغتیا، پاکوالي او د ځان ساتنې په اړه نوي او ګټور معلومات ترلاسه کړي.
دغه کتاب د غوټۍله خوا لیکل شوی او د اکسوس کتاب پلورنځي له لوري چاپ شوی دی. د اکسوس کتاب پلورنځي مسوولین وایي، دوی تر دې وړاندې هم د غوټۍ کوچنی ټولګی تر سرلیک لاندې د ماشومانو د پوهاوي او زدهکړې لپاره په بېلابېلو موضوعاتو کتابونه چاپ او په وړیا توګه وېشلي دي.
د غوټۍ کوچنی ټولګی دغه لړۍ د افغان ماشومانو د علمي او روغتیايي پوهاوي د لوړولو په موخه رامنځته شوې ده، چې کتابونه یې تر دې وړاندې هم په کابل او د هېواد په یو شمېر ولایتونو کې ماشومانو ته رسېدلي دي. د اکسوس کتاب پلورنځي مسوولین وایي، د ماشومانو د پوهاوي او زدهکړې د پیاوړتیا لپاره به د کتابونو د وړیا وېش لړۍ دوام ولري.
