د پکتیا امنیتي مسوولینو ویلي چې د پاکستان پوځي رژیم د دغه ولایت د څمکنیو ولسوالۍ د مندخېلو سیمې پر ملکي مېشتو سیمو هوايي بریدونه کړي دي. د چارواکو په وینا، په دغو بریدونو کې له ۳۵ څخه زیات کسان شهیدان او شاوخوا ۲۰۰ نور ټپیان شوي دي.
ځايي اوسېدونکو ویلي چې د بسمالله جان په نوم د یوه ملکي وګړي کور په مستقیم ډول په نښه شوی دی. هغوی زیاته کړې چې کله خلک د قربانیانو د ژغورنې لپاره د پېښې ځای ته ورغلل، دویم برید هم ترسره شو چې له امله یې مرګژوبله نوره هم زیاته شوه.
همدارنګه، د پکتیکا ولایت د ګیان ولسوالۍ کې د پاکستان په هوايي بریدونو کې د یوې کورنۍ شپږ غړي، چې ښځې او ماشومان هم پکې شامل وو، شهیدان شوي دي.
په همدې حال کې، د اسلامي امارت ویاند ذبیحالله مجاهد د پاکستان د پوځي رژیم د تېرې شپې د پکتیکا د ګیان ولسوالۍ، د پکتیا د څمکنیو ولسوالۍ او د کونړ د منورې ولسوالۍ پر ځینو سیمو ترسره شوي هوايي بریدونه په کلکو ټکو وغندل. نوموړي دغه بریدونه «جنایت او وحشت» وبلل او ویې ویل چې په دې بریدونو کې ملکي وګړي په نښه شوي دي. د هغه په وینا، د ښځو او ماشومانو په ګډون لسګونه کسان شهیدان او ټپیان شوي دي.
