د ملګرو ملتونو د بشري مرستو د همغږۍ دفتر (اوچا) وايي، د بامیانو په ځینو سیمو کې وچکالۍ او د اوبو کمښت د خلکو ژوند له جدي ستونزو سره مخ کړی او ګڼې کورنۍ یې د خپلو مېنو پرېښودو ته اړ کړې دي. اوچا په خپل تازه راپور کې ویلي چې د بامیان د ځینو لرې پرتو سیمو اوسېدونکي د اوبو د سخت کمښت له امله د ژوند لومړنیو اړتیاوو ته په لاسرسي کې له ستونزو سره مخ دي او ژوند یې «ناممکنېدو ته نږدې شوی» دی.د راپور له مخې، د یکاولنګ ولسوالۍ په یوه کلي کې نږدې نیمایي اوسېدونکي په تېرو پنځو کلونو کې د کرنیزو ځمکو د خړوبولو لپاره د اوبو د نشتوالي له کبله له سیمې کډه شوي دي. اوچا خبرداری ورکړی چې د افغانستان په لرې پرتو او زیانمنو سیمو کې اوسېدونکي د اقلیمي بدلونونو او بشري کړکېچ له اغېزو تر ټولو ډېر زیان ویني او بېړنیو مرستو ته اړتیا لري.
