ټاکل شوې، چې د روانې غبرګولي میاشتې په لړ کې په کابل کې د «صنعت او معدن» اونۍ پنځم ملي او نړۍوال نندارتون پرانېستل شي. د مالوماتو له مخې په دغه نندارتون کې به د افغان صنعتکارانو او پانګوالو ترڅنګ د بېلابېلو هېوادونو استازي هم ګډون وکړي. د افغانستان د کانونو او صنایعو خونې مرستیال خان محمد وردګ ویلي، په نندارتون کې به د چین، روسیې، د منځنۍ اسیا هېوادونو او نورو بهرنیو شرکتونو استازي ګډون وکړي، چې دا به په افغانستان کې د پانګونې لپاره ښه فرصت برابر کړي. همداراز، د افغانستان د نړیوال نندارتون مرکز مشر محمد صابر لطفي ویلي، د ایران، روسیې او ازبکستان چارواکو هم په دغه نندارتون کې د ګډون ډاډ ورکړی دی. د مسوولانو په وینا، د نندارتون موخه د افغانستان د صنعت او کانونو د سکتور د ظرفیتونو معرفي کول او د کورنیو او بهرنیو پانګونو جلبول دي.
