د پکتیکا ولایت د اورګون ولسوالۍ په دهنې سیمه کې درې ځوانان د لامبو پر مهال د اوبو په ډنډ کې ډوب شوي او ژوند یې له لاسه ورکړی دی. د پکتیکا امنیې قوماندانۍ په یوه خبرپاڼه کې ویلي، لومړی دوه کسان د لامبو پر مهال ډوب شوي وو او درېیم کس د هغوی د ژغورلو هڅه کړې، چې هغه هم په اوبو کې ډوب شوی او خپل ژوند یې له لاسه ورکړی. چارواکي وایي، د اورګون ولسوالۍ د امنیه قوماندانۍ منسوبینو د لامبو وهونکو په مرسته د قربانیانو جسدونه له اوبو را ایستلي دي. د معلوماتو له مخې، مړه شوي کسان د پکتیکا د زېړوک ولسوالۍ اصلي اوسېدونکي وو، خو دا مهال په اورګون ولسوالۍ کې مېشت وو.
