د ملګرو ملتونو د ماشومانو د ملاتړ صندوق (یونیسف) وايي، د افغانستان په زلزلهځپلو سیمو کې لا هم ګڼې کورنۍ پاکو اوبو ته د لاسرسي له ستونزو سره مخ دي. د یونیسف د راپور له مخې، د افغانستان په ختیځ کې د مرګونې زلزلې له تېرېدو یو کال وروسته هم د پاکو اوبو اړتیا د زیانمنو کورنیو لپاره یوه مهمه ننګونه بلل کېږي. یونیسف ویلي، د ملګرو ملتونو د بشري مرستو صندوق په مالي ملاتړ په زیانمنو سیمو کې د لمریزې انرژۍ پر بنسټ د اوبو رسولو سیستمونه او ژورې څاګانې جوړې شوې دي، څو خلکو ته د پاکو اوبو زمینه برابره شي. د دغه بنسټ په وینا، یادې پروژې له ماشومانو او کورنیو سره مرسته کوي چې بېرته خوندي او پاکو اوبو ته لاسرسی ومومي.
