د سعودي عربستان د بهرنیو چارو وزیر، فیصل بن فرحان آل سعود، پر ایران د ډونالډ ټرمپ د برید نه کولو او ډيپلوماتیکو مذاکراتو ته د فرصت ورکولو له پرېکړې هرکلی کړی دی. الجزیرې راپور ورکړی چې فیصل بن فرحان ویلي، سعودي عربستان له دې پرېکړې ملاتړ کوي او دا ګام کولای شي له ایران سره د منلو وړ هوکړې ته زمینه برابره کړي. هغه زیاته کړې چې ډيپلوماسۍ ته فرصت ورکول به د جګړې د پای ته رسېدو او د هرمز تنګی په سیمه کې د امنیت او سمندري تګراتګ د عادي کېدو سره مرسته وکړي. د سعودي بهرنیو چارو وزیر له ایران هم غوښتي چې د خبرو د پرمخ بېولو لپاره هڅو ته ژر مثبت ځواب ووايي.
