د افغانستان د بیارغونې لپاره د امریکا پخواني ځانګړی سرمفتش، جان سوپکو، ویلي چې په افغانستان کې د امریکا ۲۰ کلنې جګړې، سره له دې چې ټریلیونونه ډالره پرې ولګېدل، د خلکو د وژنې، د فساد د پراخېدو او د پیسو د ضایع کېدو سبب شوه. نوموړي ویلي، کابو ټولو نړۍوالو بنسټونو د افغانستان له جګړې ګټه کړې ده. سوپکو په یوه تازه مرکه کې ویلي، امریکا د افغانستان د بیارغونې لپاره له شاوخوا ۱۴۸ تر ۱۵۰ میلیارده ډالره لګولي دي. سوپکو زیاته کړې، په افغانستان کې د امریکا د شپنیو عملیاتو او پوځي بریدونو پایله د ملکي خلکو وژل کېدل وو او د هغه په باور، دغو اقداماتو د جګړې ځینې پاتې شوي کسان تاوتریخوالي ته هڅولي دي. هغه ویلي، امریکا په جګړه کې قوي ده، خو د دولت او هېواد په جوړولو کې ناکامه ده.
