پرون د اکتوبر د میاشتې په اتمه نېټه په کابل کې د چین ولسي جمهوریت سفارت لخوا د دغه هېواد د جوړېدو د ۷۶ مې کلیزې په مناسبت ځانګړي مراسم او مېلمستیا تر سره شوه.
په دغو مراسمو کې د افغانستان اسلامي امارت د بهرنیو چارو وزارت مالي او اداري مرستیال دوکتور محمد نعیم وردګ، په کابل کې د فعالو بهرنیو سفارتونو استازو، د ملګرو ملتونو د استازولۍ غړو او یو شمېر نورو کورنیو او بهرنیو مېلمنو ګډون کړی و.
د مراسمو په پیل کې په افغانستان کې د چین ولسي جمهوریت سفارت سفیر جیاو شینګ وینا وکړه او راغلو مېلمنو ته یې ښه راغلاست وویل. هغه د دواړو هېوادونو د دوستانه اړیکو پر دوام ټینګار وکړ.
ورپسې د افغانستان د اسلامي امارت د بهرنیو چارو وزارت مالي او اداري مرستیال دوکتور محمد نعیم وردګ د اسلامي امارت په استازیتوب د چین ولسي جمهوریت د جوړېدو د ۷۶ مې کلیزې مبارکي وویله او چین یې د افغانستان ښه ګاونډی او دوست هېواد یاد کړ. نوموړي زیاته کړه، چې اوس مهال د چین او افغانستان اړیکې په ښه حالت کې دي او هیله یې څرګنده کړه چې په سیاسي او اقتصادي برخو کې د افغانستان او چین اړیکې نورې هم پیاوړې شي. نوموړي همدارنګه وویل، افغانستان غواړي چې د یو کمربند، یوه لار پروژه (Belt and Road Initiative) برخه شي او هیله ده چې د دواړو هېوادونو تر منځ د واخان دهلیز له لارې سوداګري پیل شي.
