د ملګرو ملتونو پراختیايي پروګرام (یو این ډي پي) خبر ورکړی، چې ۷ افغان کرنیزو شرکتونو د دغه بنسټ او اروپايي ټولنې په ملاتړ د (اې سي ار پي) پروژې له لارې په نوې ډیلي کې د «هند د نړیوالو خوراکي توکو ۲۰۲۵ کال نندارتون» کې ګډون کړی دی. یاد بنسټ پرون پر خپله اېکسپاڼه لیکلي چې دا شرکتونه د کندهار او هلمند اړوند دي. د ملګرو ملتونو د پراختیايي پروګرام په خبره، په دغه نندارتون کې میوې، د افغانستان درمل او ځينې نور محصولات نندارې ته وړاندې شوي دي. د دې پروژې مسوولین وايي چې د دغو شرکتونو ګډون نړیوالو بازارونو ته د افغان توکو د لار موندلو یو فرصت دی او دا د هېواد په اقتصاد کې هم ښه ونډه لرلی شي.
