د مالیې وزارت له لوري د ۷ نورور ادارو د متقاعدينو د حقوقو د ورکړې مهال وېش هم اعلان شو. ياد وزارت په يوه خبرپاڼه کې ویلي، چې په دې نوبتي پړاو کې به د اراضۍ ادارې، د ښځو چارو وزارت، په پارلماني چارو کې د دولت وزارت، مشرانو جرګې، ولسي جرګې، د المپیک ملي کمېټې او د دولتي برجسته رجال د ساتنې او امنیت ریاست ادارو د متقاعدینو تقاعد حقوق ورکړل شي. د خبرپاڼې د مالوماتو له مخې د تقاعد د حقوقو د ورکړې لړۍ، چې د روان کال د وږي میاشتې له دویمې نېټې پیل شوې د دویمې میاشتې نوبتي مهالوېش سره سم به د یوې میاشتې په موده کې د پورته ۷ تثبیت شویو ادارو د متقاعدینو د حقوقو ورکړې لړۍ طی مراحل کړي. د ماليې وزارت په خبرپاڼه کې همدارنګه راغلي، چې د پاتې نورو ادارو مهالوېش به د روان کال د تلې میاشتې پر ۲۵ مه نېټه اعلان شي.
