د پانګونې بين الوزارتي کمېټې په پرونۍ نوبتي غونډه کې چې په مرمرینه ماڼۍ کې ترسره شوه، له اجنډا سره سم د جوزجان ولایت په مرکز شبرغان ښار کې د ښاروالۍ پر ځمکه د سوداګریز مارکېټ د جوړولو طرحه وړاندې او تایید وړ بلل شوې ده. د دې طرحې له مخې خصوصي سکټور د ښاروالۍ پر ۲۲۰۰ متره مربع ځمکه پینځه پوړیز سوداګریز مارکېټ جوړوي، چې دوکانونه او د موټرو پارکینګ به ولري. یاده طرحه د پانګونې بين الوزارتي کمېټې له خوا د تعدیل په راوستلو سره د تایید وړ وبلل شوه او د نهايي تصميم په موخه اقتصادي کمېسیون ته راجع شوه. د پانګونې بين الوزارتي كمېټې غونډې ته د خصوصي سکټور له خوا په هېواد کې دننه د برېښنايي وسایلو او تجهیزاتو د توليد فابریکې د جوړولو، په جوزجان ولایت کې د کورنیو چارو وزارت پر ځمکه د خصوصي سکټور له خوا د مارکېټ جوړولو او د یوه خصوصي شركت له خوا د نوي کابل په ښار کې د پانګونې طرحې وړاندې شوې دي.
