د ملګرو ملتونو سرمنشي انتونیو ګوترېش وایي، چې سوریه په نړۍ کې لاهم یو له سترو بشري ناورینونو سره مخ هیواد دی. هغه سوریې ته په بیړنیو مرستو رسولو ټینګار کړی. نوموړي پر اېکس پاڼه په سیمه کې د ملګرو ملتونو مرستندویه ادارو د کارکوونکو انځورونو په خپرولو سره لیکلي، چې همکاران يې د خلکو د اړتیاو ارزولو او لاهم په چټکۍ سره د بدلون وړ شرایطو ته د ځواب ورکولو لپاره کار کوي. نوموړي ویلي، چې د بشردوستانه او بیارغونې لپاره کافي ملاتړ خورا مهم دی. له بل پلوه د ترکیې د بهرنیو چارو وزیر هاکان فیدان دمشق ته له سفر او د سوریې له نویو مشرانو سره تر کتنې وروسته ویلي، چې سوریه ښه راتلونکی لري او دوی یې ترڅنګ ولاړ دي.
