یمن – درانه باران / میراثي ودانۍ
ایډي: 8393292
نېټه: وروستی
ځای: یمن
موده: یوه دقیقه او اوه پنځوس ثانیې
سرچینه: (CCTV)
محدودیتونه: د چینايي وګړو لپاره نه ده
خپور شوی: 2024-09-04 04:12
وروستی سمون: 2024-09-04 04:20
یمن صنعا – وروستی (CCTV) د چینايي وګړو لپاره نه ده
بشپړ خبر
په یمن کې له یوې میاشتې سختو بارانونو او سېلابونو وروسته د صنعا تاریخي زوړ ښار چې نږدې ۲۵۰۰ کاله وړاندې جوړ شوی و اوس یې د ځینو برخو د نړېدو له امله اندېښنې زیاتې شوې دي. داسې وېره شته چې که اقدام ونه شي نو دغه لرغونې ځای به نور هم زیانمن شي.
د صنعا دغه لرغونی ښار د نړۍ یو له پخوانیو ښارونو څخه شمېرل کېږي او له ۶۰۰۰ څخه ډېرې تاریخي ودانۍ لري چې ډېری یې اوس هم کارول کېږي.
په ۱۹۸۶ کال کې دا د ملګرو ملتونو تعلیمي، ساینسي او کلتوري سازمان (UNESCO) له لوري د نړیوال میراث ځای په توګه وپېژندل شو، چې د یوه مهم تاریخي مرکز په توګه یې نړیوال حیثیت لا پیاوړی کړ.
دغه ښار چې له کلونو راهیسې د کورنۍ جګړې له امله سخت ځپل شوی، اوس د پرله پسې درنو ورښتونو له یو بل لوی ګواښ سره هم مخ دی. دې بارانونو د اوبو سخت زیانونه او ساختماني بې ثباتۍ رامنځته کړې دي، چې څو زاړه تعمیرونه یې لا له وړاندې ړنګ شوي دي.
د یاد تاریخي ښار ډېری کوڅې د نړېدلو ودانیو له خاورو او کثافاتو ډکې دي.ځايي اوسېدونکو خبرداری ورکړی، چې که په سمدستي توګه د پاکولو چارې ترسره نه شي، ښايي وضعيت نور هم خراب شي.
د یوې نړېدلې ودانۍ مالک صلاح الجلال وايي، دا زما د کورنۍ زوړ کور دی، سل کاله پخوانی دی، زموږ د ګاونډي د کور تر څنګ ړنګ شوی دی، که موږ دا خاورې او خځلې پاکې نه کړو او کورونه ترمیم نه کړو، نو ښايي شاوخوا پنځه نږدې کورونه هم له خطر سره مخامخ شي.
یمن د ۲۰۱۱ کال د کړکېچ له پیل راهیسې، د تاریخي ځایونو په ساتلو کې د حکومت د پانګونې کچه په بې ساري ډول راټیټه شوې ده. سربېره پردې، د صنعا زوړ ښار د شخړو په جریان کې د بمونو له امله هم سخت زیانمن شوی، چې په ۲۰۱۵کال کې د یونیسکو سازمان له لوري دا د خطر په نړۍ کې د میراث ځای په توګه لیست کړ.
په ورته مهال د دغه ښار چارواکو د ستونزو د زیاتېدو خبرداری ورکړی او ویلي یې چې د يادو ځايونو ساتنه له پخوا ستونزمنه وه او وروستيو سختو بارانونو يې ستونزې نورې هم زياتې کړې دي.
بل خوا د یمن د تاریخي ښارونو د ساتنې د ادارې مرستیال رشاد المقطاري وویل، دا مهال د صنعا په زاړه ښار کې څه باندې دوه زره ودانۍ زیانمنې شوې دي. دا د سختو بارانونو، پخوانۍ جګړې، او د ساتنې د نشتوالي له امله دي. د نوموړي په خبره دغه زوړ ښار له کلونو راهیسې خراب شوی دی او هر کال یې د ترمیمولو هڅه کوو، خو سږ کال سختو بارانونو ډېر زیانونه اړولي دي.
