د هلمند ولایت د پوهنې ریاست مسوولینو ویلي، چې د دغه ولایت په ناومېش ولسوالۍ کې د څه باندې ۵۰۰ زره افغانیو په لګښت د يوه ښوونځي لپاره ودانۍ جوړه شوې ده. د یاد ولایت د ناومېش ولسوالۍ د پوهنې آمریت د مالوماتو له مخې د ښوونځي دغه ودانۍ په نوشور کلي کې د ولسي خلکو او د سیمه ییزو ادارو په مالي لګښت جوړه شوې ده. د مالوماتو له مخې په دغه ودانۍ۵۲۰ زره افغانۍ لګښت راغلی او پر ۵ جریبه ځمکه د ۱۴ درسي ټولګيو او زده کړې منظم چاپېریال په لرلو سره جوړه او ګټې اخیستنې ته سپارل شوې ده. د هلمند د پوهنې ریاست مسوولین وایي، دوی هڅه کوي چې دې ته ورته په نورو لرې پرتو سیمو کې هم د ښوونځيو لپاره ودانۍ جوړې کړي.
