د هرات ولایت د نشه يي توکو پر وړاندې د مبارزې مدیریت مسوولینو خبر ورکړی دی، چې په دغه ولایت کې د روزګان، هلمند، کندهار، دایکنډي او زابل ولایتونو اړوند په نشه يي توکو د ۳۵۲ روږدو کسانو درملنه شوې ده. د یاد ولایت د امنیې قوماندانۍ د نشه يي توکو پر وړاندې د مبارزې مدیریت د مالوماتو له مخې، یاد شمېر کسان پخوا له روزګان، هلمند، کندهار، دایکنډي، او زابل ولایتونو څخه ۴۰۰۰ بستریز کمپ ته پېژندل شوي وو او له یوه کال درملنې وروسته اړوندو ولایتونو ته ولېږدول شول. دا په داسې حال کې ده، چې په وروستیو کې د پلازمینې کابل په شمول په یو شمېر نورو ولایتونو کې هم د ګڼ شمېر روږدو کسانو درملنه شوې او یو شمېر کسانو ته یې حرفوي زده کړې هم ورکړل شوي دي.
