افغان پانګوال ميرويس عزيزي په نږدې راتلونکي کې په هېواد کې د اوسپنې پټلۍ د پراختیا او انرژۍ په برخو کې د ۱۰ مليارده امريکايي ډالرو د پانګونې خبر ورکړی دی. عزيزي، چې پرون يې د زلزله ځپليو لپاره د نوموړي له لوري جوړ شوي ښارګوټي د پرانيستې په موخه له دوبۍ څخه هرات ته سفر کړی وو، همدارنګه ويلي چې په دې سره به زرګونه ځوانانو ته د کار زمينه برابره شي. د نوموړي په خبره له دغه پانګونې څخه يې موخه د افغانستان اقتصادي پراختيا او د کار زمينې ايجادول دي. په ورته وخت کې د هرات والي د ياد سوداګر د دغه بې مخينې اقدام ستاينه وکړه او په نړيوالو مرستندويو بنسټونو يې غږ وکړ، چې د نمايشي مرستو پر ځای د افغان ولس د بسياينې او لاسنیوي په موخه د عمل ميدان ته را ودانګي.
