د لوګر د پوهنې ریاست د مرکز او ولسوالیو د پوهنې آمریتونو ته د نږدې ۱۹ میلیونه افغانیو په ارزښت د ښوونکو او زده کوونکو د درسي کیټونو د انتقال لړۍ پیل کړه. د لوګر د پوهنې ریاست ویاند شاه پور عرب سپوږمۍ راډیو ته وویل، چې د انتقالېدو دا لړۍ د پوهنې وزارت او د ملګرو ملتونو د ماشومانو د ملاتړ صندوق یا یونیسف د هدایت پر اساس پیل شوه، چې نن او سبا به د مرکز او ټولو ولسوالیو د پوهنې آمریتونو ته ورسول شي. نوموړي وویل، چې د پوهنې آمریتونو ته په لېږدېدونکو توکو کې؛ ۲۹۹ کیټه د ښوونکو درسي توکي ، ۲۷۳۵ کیټه د زده کوونکو درسي مواد ، ۶۲ کیټه د زده کوونکو سپورټي وسایل او ۲۶۲ کیټه نور د ښوونځیو تخنیکي وسایل شامل دي، چې دغه کیټونه د پوهنې ریاست د غوښتنې له مخې یونیسف چمتو کړي دي.
