د لغمان ولایت مهترلام ښاروالۍ ریاست مسوولینو خبر ورکړی، چې د یاد ریاست په عوایدو کې د تېرکال په پرتله ۴۰ سلنه زیاتوالی راغلی دی. د مهترلام ښاروالۍ رییس د درېیمې ربعې د حساب ورکولو په غونډه کې وویل چې سږکال یې په ۹ میاشتو کې له ۱۷ بېلابېلو سرچینو څخه ۶۹ میلیونه افغانۍ عواید راټول کړي چې د تېرکال په ۱۲ میاشتو کې یواځې ۶۰ میلیونه افغانۍ عواید راټول شوي وو چې سږ کال دا رقم ۴۰ سلنه ډېروالی ښیي. د یاد ریاست مسوولین د عوایدو د زیاتوالي لامل ښه حکومتولي او له فساد څخه د ادارې پاکوالی یادوي. بل لور ته د ښاروالۍ د سکتوري برخې مسوولین وایي، چې په همدې موده کې یې د ښار په بېلا بېلو برخو کې د بیا رغونې کارونه ترسره کړي او پر یوشمیر نورو یې کار روان دی.
