د افغانستان کرکټ ملي لوبډله سبا دوشنبه د متحده عرب اماراتو په وړاندې خپله لومړۍ ۵۰ اوریزه تمریناتي لوبه ترسره کوي. د شارجه د کرکټ په نړیوال میدان کې دغه لوبه د کابل پروخت د سهار لس نیمې بجې پیلېږي. د مالوماتو له مخې افغانستان کرکټ ملي لوبډله له اماراتو لوبډلې سره ۵ لوبې ترسره کوي، د تمریناتي لوبې په ګډون د دواړو لوبډلو ترمنځ د ډیسمبر میاشتې له ۲۵مې د جنورۍ تر دویمې نېټې ۲ یو ورځنۍ تمریناتي او ۳ شل اوریزې نړیوالې لوبې ترسره کیږي. د یو ورځنیو لوبو لپاره د لوبډلې نوملړ کې حشمت الله شهیدي لوبډلمشر اعلان شوی او ترڅنګ یې د تجربه لرونکو لوبغاړو تر څنګ ځوانو لوبغاړو ته هم فرصت ورکړل شوی دی.
