د افغانستان د سرپرست حکومت چارواکي وایي، په هیواد کې ټولو خصوصي پوهنتونونو ورسره ژمنه کړې، چې په زرګونه هغو محصلینو ته د زده کړو وړیا زمینه برابروي چې له پاکستان څخه خپل هېواد ته راستانه شوي دي. د کابل د کډوالو چارو رئیس ویلي چې هر پوهنتون ورسره د ۱۰۰ وړیا سکالرشیپونو ژمنه کړې ده او د ډیرو نورو لپاره یې ۸۰ سلنه تخفیف په نظر کې نیولی دی. د سرپرست حکومت چارواکي وايي چې د بیرته ستنو شویو هیوادوالو لپاره د زده کړو د فرصت برابرولو ترڅنګ، د دوی لپاره د کاري فرصتونو د رامنځ ته کولو هڅې هم کوي. د ملګرو ملتونو د کډوالو د عالي کمیشنرۍ د معلوماتو له مخې، له پاکستان څخه د افغان کډوالو د ایستلو لړۍ د پیل راهیسې، تر ۳۵۰ زره پورې وګړي افغانستان ته را ستانه شوي دي، چې دا لړۍ لا هم روانه ده.
