د ملګرو ملتونو د سرمنشي ځانګړې استازې او مرستیال يې تورخم ته تللي او هلته يې له راستنېدونکو کډوالو سره کتلي دي. یوناما په خپل فېسبوک ليکلي، چې راستنېدونکي کډوال د سرپناه او روغتیا په برخو کې بېړنیو مرستو ته ضرورت لري او ملګري ملتونه له خپلو همکارانو سره په ګډه خپلې ټولې هڅې کوي چې له افغانانو سره مرستې وکړي. له دې مخکې اوچا ویلي وو، له پاکستانه په بېسارې ډول د کډوالو راستنېدل به پر افغانستان چې له پخوا راهیسې د سرپناه او ورځینو خدمتونو په ګډون د سرچینو او امکاناتو له کمښت سره مخ دی فشارونه لا پسې زیات کړي. د اوچا معلوماتو له مخې، د روان کال د سپټمبر له نیمايي تر تېرې ورځې پورې ۳۲۷ زره او ۴۰۰ افغانان له پاکستانه خپل هېواد ته ستانه شوي دي.
