د ملګرو ملتونو سرمنشي، انتونیو ګوتریش امنیت شورا ته د ارزونې په يوه راپور کې لیکلي، چې افغانستان سره دې په امنیتي، سیاسي او سیمه ییزو برخو کې همکارۍ وشي او پر داسې لاروچارو دې غور وشي چې افغانستان له نړيوال نظام سره ګډ شي. د انتونیو ګوترش دا ارزونه د ملګرو ملتونو د امنیت شورا هغې غوښتنې په ځواب کې استول کیږي چې له هغه یې د روان کال په مارچ میاشت کې د افغانستان د وضعیت ارزونې په اړه کړې وه. په دې ارزونه کې لیکل شوي، چې د افغانانو بیړنیو اړتیاوو لکه روغتیا، معیشیت او د خوړو خوندیتوب مرستې باید له سیاسي کېدو لرې شي ترڅو دوامداره مرستو ته لا هواره شي. انتونیو ګوتریش د یو داسې میکانیزم د جوړېدو غوښتنه کړې چې د تعامل ملاتړ وکړي او د ملګرو ملتونو ځانګړي استازي/استازې ته باید دنده ورکړ شي چې د نړۍوالې ټولنې او افغانانو ترمنځ د تعامل رامنځته کولو اسانتیاوې رامنځته کړي. د ملګرو ملتونو سرمنشياو ټینګار کړی، چې د ښځو حقونو درناوی وشي، په ټولو برخو کې ونډه ورکړ شي او د ټولو افغانانو بنسټیز حقونه او ازادۍ خوندي شي.
