د ریاستالوزرا اقتصادي مرستيال وايي؛ ايران ته د خپل سفر په ترڅ کې یې له ايراني لوري سره ډېر هوکړه لیکونه لاسلیک کړي، چې دا به د دواړو هېوادونو لپاره ستره لاسته راوړنه وي. اقتصادي مرستیال د کابل په هوايي، ډګر کې پرون ناوخته خبریالانو سره په خبرو کې وویل، چې د دې سفر پر مهال د ایران له چابهار او اصفهان له بندرونو څخه یې هم لیدنه وکړه او دغه بندرونه د افغانستان د صادراتو او وارداتو لپاره ډیر ښه ثابتیدلی شي. برادر وویل، ایران ته یې د سفر موخه داوه، څو له ایران سره نه یواځې سوداګرۍ او په بېلا بېلو برخو کې اړیکو ته پراختیا ورکړي او وکولی شي، چې خپل وطني تولیدات په اسانه توګه نورو هېوادونو ته ورسیږي. د صنعت او سوداګرۍ سرپرست وزیر چې له اقتصادي مرستیال سره یې په دې سفر کې ملتیا کوله وویل، چې ایران ته یې د خپل سفر په ترڅ کې له ایراني چارواکو سره د اقتصادي، هوايي چلند، بندري مسایلو، ترانسپورټ، او د اوسپنې ویلې کولو په برخو کې ۶۸ هوکړه لیکونه لاسلیک کړي دي.
