د کورنیو چارو وزارت سرپرست وايي، چې له پاکستان څخه په زور او جبر د افغانانو ایستل د ټولو اسلامي او نړۍوالو اصولو خلاف عمل دی. نوموړي خوست ولايت کې يوې غونډې ته ويلي چې پاکستان په سختو شرايطو کې افغانانو ته پناه ورکړه، خو په داسې زور او جبر سره د افغان کډوالو ايستل مناسب نه دي. ده زياته کړې، چې پاکستان ته ګيله ولاړه ده چې ګواکې د هغوی کورنۍ مشکل د افغانستان له طرفه دی، مګر دوی د دوحې د ژمنې پر اساس هېچا ته اجازه نه ورکوي چې افغان خاوره د چا پر خلاف وکاروي. هغه له پاکستانه وغوښتل چې په خپله پرېکړه دې له سره کتنه وکړي. نوموړي همدا راز د ۳۴ ولایتونو پر واليانو هم غږ وکړ چې هغوی دې د راستنېدونکو افغانانو سره په هره برخه کې بشپړه همکاري وکړي.
