د ملګروملتونو د بشري مرستو د همغږۍ اداره اوچا وايي، له هغې بسپنې څخه چې د هرات د زلزلې له مصیبت ځپلو سره د مرستې لپاره یې غوښتې وه، یوازې په سلو کې ۲۶ یې ترلاسه کړې ده. اوچا په یوه راپور کې ویلي دي چې د ژمي په درشل کې یې له زلزله ځپلو سره د مرستې لپاره څه باندې ۹۳ میلیونه ډالره بسپنه غوښتې ده. په راپور کې راغلي دي چې مرستندویې موسسې، په سیمه کې له اړو خلکو سره د خېمو، نغدو پیسو، خوړو، روغتیايي خدماتو او نورو برخو کې مرستې کوي. د هرات د زلزلې د زیانونو په اړه د اوچا په دوبم راپور کې ویل شوي چې دې زلزلې له ۴۸ زرو ډېرو کورونو ته زیان اړولی چې له دې ډلې ۱۰ زره کورونه په بشپړ ډول ویجاړ شوي دي.
