له پاکستانه د بې اسناده کډوالو وتلو لپاره د اعلان شوي وخت پای ته رسېدو ته اوس یوازې یوه ورځ پاتې ده. خو له دې سره په دغه هېواد کې د افغان کډوالو د نیول کېدو او په دې تړاو د حکومت پر پالیسۍ نیوکو هم زور اخیستی. بلخوا بیا د افغانستان سرپرست حکومت په جبري توګه د راستنېدونکو کډوالو ستونزو ته د رسېدو پر لارو چارو کار پیل کړی. سرپرست حکومت تازه د دغو کډوالو ستونزو ته د رسېدو لپاره د یو عالي کمېسیون د جوړولو اعلان وکړ، چې مشري یې د ریاست الوزرا اداري مرستیال عبدالسلام حنفي کوي او د بېلابېلو ادارو ۳۱ چارواکي یې غړي دي. په ورته مهال افغان او پاکستاني چارواکي وايي، هره ورځ زرګونه افغان کډوال د سپین بولدک او تورخم له لارو افغانستان ته ستنېږي.
