طبیعي پېښو ته د رسېدو په چارو کې د دولت وزارت وايي، سږ کال د طبیعي پېښو له امله په ټول هېواد کې له ۱۰۰۰ ډېر کسان مړه شوي او تر دوه زره ډېر ټپیان شوي دي. د دغه وزارت د ګواښونو د کمېدو رییس ملا جانان سایق په کابل کې د طبیعي پېښو د ګواښونو کمښت پروژې د لاسته راوړنو ملي سیمینار په څنډه کې ویلي، د روان هجري لمریز کال د ورښتونو په ترڅ کې نږدې ۱۱ زره کورونه ویجاړ شوي. پېښو ته د رسېدو په چارو کې د دولت وزارت چارواکي زیاتوي، اوسمهال د هېواد ۲۲ ولایتونه د طبیعي پېښو له ګواښ سره مخ دي. پېښو ته د رسېدو په چارو کې د دولت وزارت د اطلاعاتو پر بنسټ، دغه وزارت یو شمېر هغو کورنیو ته چې د طبیعي پېښو له امله زیانمنې شوې دي، ځمکې او کورونه وېشلې دي.
