د ایران حکومت لخوا افغانستان ته د سلګونو افغان بندیانو تر سپارل کېدو وروسته، د افغانستان د سرپرست حکومت چارواکي وايي چې ټاکل شوې د دغه بندیانو دوسیې د شریعت او قانوني اسنادو په اساس فیصله شي. د زندانونو چارو ادارې ویلي چې د ایران حکومت تر دا مهاله ۸۵۸ افغان بندیان افغانستان ته سپارلي دي. د یادې ادارې مشر محمد یوسف مستري په هرات، فراه او نیمروز ولایتونو کې اړوندو ادارو ته سپارښتنه کړې چې د دغه زندانیانو دوسیې ژر تر ژره وڅېړي او د قوانینو په اساس پرېکړه وکړي. تهران ته د سرپرست حکومت د پلاوي تر سفر وروسته، د ایران حکومت په څه باندې یوه اونۍ کې سلګونه افغانان چې د هغه هیواد په زندانونو کې بندیان و د طالبانو حکومت ته سپارلي دي.
