روغتیایي چارواکي وایي چې د دوشنبه په ورځ د پلازمینې کابل په ګډون د افغانستان په ټولو ولایتونو کې د پولیو ضد کمپاین پیلیږي. د پولیو د له منځه وړلو د بیړني عملیاتي مرکز مسوولین وایي چې دا یو سرتاسري کمپاین دی، چې د پلازمینې کابل په ګډون د افغانستان په ټولو ولایتونو کې ترسره کیږي، او ټول له پنځو کالو څخه کم عمره ماشومان تر پوښښ لاندې نیسي. د یاد مرکز مسوولین له کورنیو، په ځانګړي ډول له میندو او پلرونو غواړي چې له واکسیناتورانو سره همکاري وکړي، او خپل ټول له پنځو کالو څخه کم عمره ماشومان واکسین کړي، تر څو د پولیو د معلولونکې ناروغۍ پر وړاندې وقایه شي. بل پلو، د پلازمینې کابل یو شمېر اوسیدونکي د کمپاین د تطبیق پر مهال له واکسیناتورانو سره همکاري، د ګوزڼ ناروغۍ په مخنیوي کې یو مهم ګام بولي.
