د کار نړیوال سازمان وايي په افغانستان کې د ۲۰۲۱ کال د اګست په میاشت کې په دولت کې له تحول راهیسې د ښځو د کار کچه په کمساري توګه راټيته شوې ده. د دغه سازمان له خوا په خپره شوې خبرپاڼه کې راغلي، اټکل شوی چې د ۲۰۲۲ کال په څلورمه ربع کې د ښځو په کار او استخدام کې د ۲۰۲۱ کال د دویمې ربعې، څخه د مخکې حالت په پرتله ۲۵ سلنه کموالی راغلی دی. دا په داسې حال کې ده چې په همدې موده کې د نارینه وو د کار او استخدام په کچه کې يواځې ۷ سلنه کموالی ليدل شوی دی. د خبرپانې په حواله د کار په بازار کې د ښځو د ونډې پر وړاندې موجودو محدودیتونو دې کمښت ته لاره هواره کړې ده. له بله پوله کورني شخصي کاروبارونو ته د کار په بازار کې د ښځو د ونډې اصلي بڼه ګرځېدلې ده چې د دې شمېرې د لا زياتو راټيتېدلو مخه يې نيولې ده. خبرپاڼه کې د افغانستان لپاره د کار د نړیوال سازمان مشر همغږي کوونکي رامین بهزاد په دې تړاو ويلي د نجونو او ښځو پر وړاندې محدودیتونه د هغوی پر زده کړو او د کار د بازار پر امکاناتو باندې خورا سختې اغېزې لري.
