د کډوالۍ نړیوال سازمان د هرات په انجیل ولسوالۍ کې له ایران او پاکستانه راستنو شویو شاوخوا ۱۲۰ کورنیو ته د سرپناه جوړولو او د کورونو بیارغونې لپاره ۱۸ میلیونه افغانۍ نغدي مرستې وېشلې دي. د هرات د طبیعي پېښو پر وړاندې د مبارزې ریاست د مسوولینو په وینا، له دغو مرستو ۷۰ کورنۍ د سرپناه جوړولو او ۵۰ نورې د خپلو کورونو د بیارغونې لپاره ګټه اخلي. په دغه ریاست کې د وقایوي پروژو مسوول اتل امیر ویلي، د ژمي د ستونزو له امله له ایران او پاکستانه راستنو شویو کورنیو ته د کډوالۍ نړیوال سازمان په همکارۍ د سرپناه برابرولو هڅې شوې دي. بلخوا، یادې کورنۍ وايي چې د اوسېدو مناسب ځای نه لري او د کورونو جوړولو او بیارغونې لپاره لا زیاتو مرستو ته اړتیا لري.
