د کونړ د عامې روغتیا ریاست مسوولینو ویلي، د دغه ولایت د څوکۍ ولسوالۍ د چلس په سیمه کې زلزلهځپلو ته د روغتیايي خدمتونو د وړاندې کولو لپاره یو نوی روغتیايي مرکز ګټې اخیستنې ته سپارل شوی دی. د چارواکو په وینا، پر دغه مرکز شاوخوا پنځه میلیونه افغانۍ لګښت راغلی او د استرالیا مېشتو افغانانو په مالي مرسته جوړ شوی دی. مسوولین وایي، یاد روغتیايي مرکز به د سیمې نږدې اووه زره اوسېدونکو ته لومړني او اړین روغتیايي خدمات وړاندې کړي او د ناروغانو د درملنې په برخه کې به شته ستونزې راکمې کړي. د سیمې اوسېدونکو هم د دغه مرکز جوړېدل مهم ګام بللی او د لا زیاتو روغتیايي اسانتیاوو غوښتنه یې کړې ده.
