د کور او ښار جوړولو وزارت خبر ورکړی، چې په هلمند ولایت کې راستنېدونکو کډوالو ته د استوګنې د ځمکو د نومرو وېش لړۍ پیل شوې ده. د یاد وزارت په وینا، د کډوالو د اسانتیا او د چارو د ښه تنظیم لپاره دوه بېلابېل تخنیکي او اداري پلاوي ټاکل شوي دي. یو پلاوی د فورمو د برابرولو او اداري بهیر چارې پر مخ وړي او بل پلاوی په سیمه کې اړمنو کډوالو ته د استوګنې نومرې سپاري. د یاد وزارت د خبرپاڼې له مخې، د نومرو وېش بهیر د روڼتیا، عدالت او منظمې همغږۍ پر بنسټ روان دی او یوازې هغو کورنیو ته نومرې ورکول کېږي چې نومونه یې په تایید شویو نوملړونو کې شامل وي.
