د ارګ له لوري په خپره شوې خبرپاڼه کې ویل شوي، چې د ریاستالوزراء مقام د دفتر عمومي رییس ډاکټر ملا عبدالواسع د افغانستان لپاره د ملګرو ملتونو د کډوالو عالي کمیشنرۍ له رییس عرفات جمال سره کتلي دي. د خبر پاڼې له مخې په دې کتنه کې د افغان کډوالو د ستونزو، اجباري راستنېدنې، د اسلامي امارت له لوري د راستنېدونکو د مدیریت او همدارنګه په نږدې راتلونکي کې افغانستان ته د ملګرو ملتونو د کډوالو عالي کمیشنرۍ د عمومي رئیس د سفر په اړه خبرې او بحثونه شوي دي. عرفات جمال زیاته کړې، چې په ۲۰۲۵ میلادي کال کې د نړۍ په کچه افغانستان ته تر ټولو ډېر کډوال په اجباري ډول راستانه شوي او د اسلامي امارت مسؤلینو د هغوی لپاره مناسب ترتیبات نیولي دي.
