د ا.ا ویاند ذبیحالله مجاهد ویلي، چې د پاکستان د پوځ د ویاند وروستۍ تبصرې چې د یوه خبري کنفرانس په ترڅ کې یې د افغانستان حکومتي او اجتماعي ساختار په اړه کړي دي، نه یوازې له واقعیت سره هېڅ تړاو نه لري، بلکې د یو مسوول پوځي موقف له معیارونو سره هم په ټکر کې دي. د نوموړي په وینا؛ افغانستان د قوي امنیتي جوړښت او مقتدرې رهبرۍ لروونکی خپلواک، او باثباته هېواد دی چې د افغانستان په ټوله خاورې کامل حاکمیت لري. مجاهد ویلي، د افغانستان په کورنیو چارو کې څرګندونې او د ګواښ ژبه کارول افغان ملت ته هېڅکله د منلو نه ده. افغان حکومت د پاکستان په اړوندو ادارو غږ کړی، چې د دواړو هېوادونو ترمنځ د اړیکو حساسیت ته په کتو، د مسوولانه دریځ او سنجیده څرګندونو لاره خپله کړي.
