په تېره یوه اونۍ کې د کابل ورودي دروازو او ښار کې ۱۳۱۰ بېاسناده او تورې ښیښې لرونکي موټر درول شوي دي. کورنیو چارو وزارت په یوه خبرپاڼه کې ویلي، چې په درول شوو وسایطو کې ۱۲۷ موټر د کابل ښار دننه د تلاشۍ په ځایونو کې متوقف شوي او د پولیسو ښارګوټي ته لېږدول شوي دي.خبرپاڼه کې راغلي، چې پاتې ۱۱۸۳ موټرو په ولایتونو پورې تړاو درلود چې کابل ښار ته د ننوتو اجازه نه ده ورکړل شوې او بېرته خپلو ولایتونو ته ګرځول شوي.
