په اوکراین کې د ملګرو ملتونو د څار ماموریت راپور ورکړی، چې د روان کال په لومړیو لسو میاشتو کې پر دغه هیواد د روسیې د بریدونو په پایله کې ۱۲۱۰۰ ملکي وګړو ته مرګ ژوبله اوښتې ده. د راپور له مخې دغه شمېره د تېر کال د ورته مودې پرتله ۲۷ سلنه زیاتوالی ښیي. بل خوا د اوکراین د پوځ مشر جنرال الکساندر سیرسکي ویلي، د زاپورېژیا په جنوبي برخه کې د جګړې شدت زیات شوی او د پوځ وضعیت د پام وړ ډول خراب شوی دی. ولادیمیر زلنسکي هم منلې، چې جګړه سخته روانه ده، په ځانګړي ډول د پوکروفسک او زاپورېژیا سیمو په محورونو کې. د زاپورېژیا والي ایوان فیدوروف تایید کړې، چې یو ۵۶ کلن ملکي وګړی د روسي بېپیلوټه الوتکې په برید کې وژل شوی او د کوچنیو ماشومانو لرونکو کورنیو ته د اجباري ایستلو امر شوی دی.
