د راپورونو له مخې د سلواکیا پلازمېنې ته نږدې د ۲ رېلګاډو د ټکر له کبله لسګونه کسان ټپیان شوي دي. د ځایي چارواکو په خبره، د ټپیانو حالت د اندېښې وړ نه دی، خو لږ تر لږه ۱۱ کسان د درملنې لپاره روغتون ته لېږدول شوي دي. د سلواکیا د کورنیو چارو وزیر ماتوش سوتای استوک ویلي، چې پېښه هغه مهال رامنځته شوه کله چې یو رېل د بل رېل له شا څخه ورسره ټکر وکړ. نوموړي په یوې خبري ناسته کې ویلي، چې په پېښه کې څوک نه دي مړه شوي. دا د تېرې یوې میاشتې په موده کې په سلواکیا کې د رېلونو دویم ټکر دی. د تلې په وروستیو کې هم د سلواکیا په ختېځ کې د دوو رېلونو د ټکر له امله له ۹۰ زیات کسان ټپیان شوي وو.
