افغانستان د خپل اقلیم، حاصلخېزې خاورې او د پېر او پلور په دودیزو لارو د لرغوني شهرت له امله د تازه میوو یو مهم تولیدوونکی هېواد دی. زموږ هېواد د نړۍ د خوږو، خوندورو او طبیعي میوو یوه خزانه ده. خو له بده مرغه، ددې ټولو نعمتونو سره سره، د تازه میوو لپاره د غوره بازار پیدا کول لا هم یوه جدي او دایمي ستونزه پاتې ده.
په هر فصل کې زموږ بزګران له ډېر زحمت وروسته ښه حاصلات تر لاسه کوي، خو د بازار د نشتوالي او د صادرولو د محدودو امکاناتو له امله ډېر وخت دغه میوې په داخلي بازارونو کې بې ارزښته پلورل کېږي او یا د ساتلو لپاره د مناسبو سړو خونو نشتوالی ددې لامل کېږي چې د څو ورځو په تېرېدو د خرابېدو له ګواښ سره مخ شي. دا حالت نه یوازې بزګر ته مالي زیان رسوي، بلکې د هېواد د اقتصاد پر پراختیا هم منفي اغېزه کوي.
د غوره بازار موندنې لپاره لومړی اړینه ده چې د صادراتو په برخه کې جدي پانګونه وشي. د نړیوالو معیارونو مطابق د بسته بندۍ، پروسس او ترانسپورټ اسانتیاوې باید برابرې شي، څو افغان میوې په مستقیم ډول نړیوالو لویو بازارونو ته ورسېږي او د منځګړو د زیاتې ګټې مخه ونیول شي. سربېره پر دې، د نړیوالو نندارتونونو، سوداګریزو غونډو او د بهرنیو هېوادونو له سوداګرو سره د اړیکو ټینګول کولای شي د افغان تازه میوو لپاره د نوو او با ثباته بازارونو د موندلو زمینه برابره کړي.
د داخلي بازار پراختیا هم مهمه ده. که د کورني صنعت لپاره د میوو د پروسس فابریکې جوړې شي، نه یوازې د خرابېدو مخه به ونیول شي، بلکې د میوو پر بنسټ نوې دندې او اقتصادي فرصتونه به هم رامنځته شي. همدارنګه، د کرنې په برخه کې د عصري ټکنالوژۍ او روزنې کارول د تولید کیفیت لوړه وي، چې د نړیوالو بازارونو غوښتنې پوره کړي.
له بلې خوا، د هوايي دهلیزونو پراختیا، د صادراتي تعرفو راکمېدل او د ګمرکي بهیر اسانتیا د دې بهیر چټکتیا او بریا تضمینوي. که دا ستونزې په ګډو هڅو حل شي، افغانستان کولای شي د نړۍ په کچه د تازه میوو یو ثابت او معتبر صادرونکی هېواد شي، چې له دې لارې به د بزګر ژوند ښه شي، ملي عواید به زیات شي او د هېواد اقتصادي خپلواکي به پیاوړې شي.
افغان تازه میوې د نړۍ په ډېرو هېوادونو کې ښه نوم لري، خو که موږ د دې نعمت د بشپړې اقتصادي ګټې اخیستنې لپاره ګامونه پورته نه کړو، زموږ بزګران به تل د حاصلاتو له پلور وروسته د مالي زیان له ویرې سره مخ وي. د افغان سرپرست حکومت، خصوصي سکتور او نړیوالو ملاتړو ته پکار ده چې په ګډه ددې دایمي ستونزې د حل او د غوره بازار پیدا کولو لپاره عملي، ارزښتناک او اوږدمهاله اقدامات وکړي.
افغانستان کې د تازه میوو لپاره د غوره بازار موندنې اړتیا
