د کډوالۍ نړیوال سازمان وایي، افغانستان ته د راستنېدونکو کډوالو د ملاتړ لپاره نړیوالې مالي مرستې ته اړتیا ده. یاد سازمان په خپله تازه خبرپاڼه کې څرګنده کړې چې له ۲۰۲۳ کال له سپټمبر میاشتې راهیسې تر ۴ میلیونه ډېر افغانان بېرته هېواد ته راستانه شوي، چې یوازې په ۲۰۲۵ کال کې یې شمېر ۱.۵ میلیونه ته رسېږي. د خبرپاڼې له مخې، تمه ده نږدې ۱ میلیون نور کډوال چې د (پي او ار) کارتونه لري هم له پاکستانه راستانه کړای شي. د کډوالۍ نړۍوال سازمان د دفتر رییس محمد عبدیکر وایي، د نورو مرستو سربېره باید هغو ټولنو ته هم پاملرنه وشي چې راستنېدونکي پکې ادغام مومي او د پانګونې او خدمتونو له وړاندې کولو پرته به راستانه شوي له سخت وضعیت سره مخ شي.
