متحده عربي اماراتو په افغانستان کې د مور او ماشوم د روغتیا لپاره ۱۰ پرمختللي روغتیایي مرکزونه جوړ او ګټې اخیستنې ته سپارلي دي. دا مرکزونه په ننګرهار، بلخ، هرات، غزني، پکتیکا، پکتیا، کندهار او هلمند ولایتونو کې د روغتیایي اړتیاوو د پوره کولو لپاره جوړ شوي دي. روغتیايي مسوولین وايي، دا مرکزونه به د نوزېږدو ماشومانو د مړینې د کمولو او د هغوی د روغتیايي ستونزو د مخنیوي لپاره، امیندوارو میندو او ماشومانو ته د درملنې او واکسین کولو خدمات وړاندې کړي.
