په غزني ولایت کې د سلطان بند د ساتنې او مراقبت پروژې چارې د څه باندې ۱۰۹ میلیونه افغانیو په لګښت نن د اوبو او انرژۍ د سرپرست وزیر ملا عبداللطیف منصور، او نورو چارواکو له لوري پيل شوې. د مسوولینو په خبره په دغه پروژه کې د بند لوړوالی ۲.۵متره زیاتېږي، د بند زیانمنې شوې برخې رغول کېږي، پاورهاوس، د اوبو وتلو پایپونه، دروازې، پرچاوي او چکسانسورونه جوړېږي، همداراز د بند پر محور لمریز ګروپونه او د ساتونکو ودانۍ هم رغول کېږي. د چارواکو به خبره یاده پروژه به په یوه کال کې بشپړه شي، چې له امله به د بند لوړوالی ۳۷.۵ مترو ته ورسېږي، د اوبو زېرمه له ۹ میلیونه څخه ۱۳ میلیونه متر مکعب ته لوړه شي او شاوخوا ۱۰ زره هکتاره کرنیزه ځمکه به خړوبه شي.
