د عمان د بهرنیو چارو وزارت خبر ورکړی، چې د ایران او امریکا تر منځ د غیرې مستقیمو مذاکراتو څلورم پړاو نن په مسقط کې پیلېږي. بلخوا د ایران د بهرنیو چارو وزیر سید عباس عراقچي هم ویلي، چې یکشنبه به په عمان کې له امریکا سره د تهران د اټومي پروګرام په تړاو د خبرو څلورم پړاو پيل شي. د عراقچي په خبره، عمان د کوربه په توګه د څلورم پړاو مذاکراتو لپاره د امریکا هوکړه هم ترلاسه کړې ده. رویټرز راپور ورکړی، چې د منځني ختیځ لپاره د امریکا ځانګړی استازی سټیف ویټکاف هم ښايي په دې پړاو مذاکراتو کې ګډون وکړي. ایران او امریکا د عمان په منځګړیتوب د تهران د هستهيي پروګرام په تړاو مذاکرات کوي او یادو مذاکراتو درې پړاوه لا له وړاندې شوي دي.
