د قزاقستان د ستراتیژیکو مطالعاتو انسټېټیوټ مشر یرکین توکوموف او مل پلاوي د بهرنیو چارو له سرپرست وزیر امیرخان متقي سره کتلي دي. په دې کتنه کې امیرخان متقي د دواړو هېوادونو ترمنځ په اقتصادي او سوداګریزو برخو کې د پرمختګونو سربېره د سیاسي اړیکو د کچې په لوړېدو ټینګار کړی دی. دغه راز دې کتنه کې د قزاقستاني پلاوي مشر ویلي، چې افغانستان ته یې د سفر موخه د افغانستان ځمکني واقعیتونه د قزاقستان ولسمشر او ولس ته منعکسول دي او زیاته کړې یې ده، چې د قزاقستان ولسمشر د افغانستان مسایلو ته ځانګړې پاملرنه لري. په دې غونډه کې دواړو لوریو له افغانستان سره د بیارغونې او زېربناوو د جوړونې، د قزاقستاني متخصصینو له تجربو څخه د ګټي اخیستنې، کرنیزو، سوداګریزو او صنعتي برخو کې د همکاریو، برېښنایي حکومتولۍ او نورو بېلابېلو برخو کې د همکاریو په تړاو هم بحث کړی دی.
