د افغانستان د سرپرست حکومت ویاند ویلي چې پاکستان کې د افغان کډوالو د وضعیت په اړه د دغه هېواد له چارواکو سره خبرې شوې دي. د سرپرست حکومت ویاند زیاتوي چې پاکستاني چارواکو په دغو خبرو کې ژمنه کړې چې افغان کډوال ونه ځورول شي. له پاکستاني چارواکو سره په داسې حال کې خبرې شوي چې په وروستیو اونیو کې له افغان کډوالو سره د دغه هېواد پولیسو د بد چلند او نیولو راپورونه خپاره شوي دي. اخوا، د پاکستان په کراچۍ ښار کې د سرپرست حکومت کونسل وایي، چې د دغې کونسلګرۍ د هڅو په پایله کې تر ۲۰۰ زیات افغان کډوال له بنده خوشي شوي دي. د پاکستان په کراچۍ کې د افغانستان د کونسلګرۍ د معلوماتو له مخې، په وروستۍ یوې میاشت کې تر ۱۰۰ زرو زیات افغان کډوال د تورخم او سپين بولدک له دروازو را اړول شوي دي.
