کابل کې ځینې متقاعدین یوځل بیا د سرپرست حکومت لخوا د معاشونو د ورکړې غوښتونکي شول. دوی وايي کهڅه هم په تېرو دوو کلونو کې یې په دې هکله په ځلونه لاریونونه وکړل خو تراوسه په دې برخه کې د سرپرست حکومت لخوا هېڅ ګام نه دی اخیستل شوی. بل خوا، د مالیې وزارت وایي، تر څو چې د سرپرست حکومت مشر په دې تړاو لارښوونه ونه کړي، هېڅ کار نه شي کولی. تر دې وړاندې مالیې وزارت ویلي و، چې څه باندې ۴۹ زره کورناستو چې څه باندې لس زره ښځې پکې شاملې دي، خپل حقوق نه دي ترلاسه کړي. دا په داسې حال کې ده، چې متقاعدینو تر دې مخکې هم د حقوقو د نه ورکول کېدو له امله اعتراضونه کړي وو.
