د کډوالو چارو وزارت له پاکستان څخه افغانستان ته د شاوخوا ۹۴۶ تنو افغان کډوالو د راستنېدو خبر ورکړی. د دغه وزارت چارواکي وایي چې له دې ډلې ۹۲۱ تنه کډوال په خپله خوښه او ۲۵ تنه نور یې هغه بندیان دي چې له خوشي کېدو وروسته هېواد ته راستانه شوي دي. دغه وزارت زیاتوي چې راستانه شوي کډوال د کډوالو چارو وزارت له خوا ثبت او اړین اسناد ورکړل شول. بلخوا هغه ۱۸ تنه افغانان چې له پاکستانه خارج شوي وو، په ننګرهار ولایت کې د تورخم دروازې له لارې افغانستان ته راستانه شول. په تورخم کې سرحدي قوماندان ویلي، چې دغه کسان د اسنادو نه لرلو له امله شاوخوا یوه میاشت د پاکستان په زندانونو کې بندیان وو چې له خوشې کېدو وروسته د تورخم له لارې بېرته افغانستان ته راستانه شول. دا په داسې حال کې ده چې په دې وروستیو اونیو کې د پاکستان پولیسو په دغه هېواد کې د افغان کډوالو د نیولو او شړلو لړۍ چټکه کړې ده.
