د پاکستان پخوانی صدراعظم او د تحریک انصاف ګوند مشر عمران خان یو ځل بیا له هغې وروسته د لاهور زمان پارک سیمه کې ونیول شو چې د اسلاماباد یوې محکمې ورته د ۳ کال بند او سل زره روپیو د جریمې جزا اعلان کړې وه. پر عمران خان تور دی چې دولتي ډالۍ یې په ناڅيزه بیه اخیستي او بیا یې بازار کې په لوړه بیه پلورلې دي. د هغه حقوقي ډلې که څه هم له محکمې غوښتنه کړې وه چې دا قضیه دې وتړل شي، خو د اسلاماباد محکمې یې هغه غوښتنه رد کړې وه. عمران خان له دې وړاندې هم نیول شوی ؤ چې په غبرګون کې یې پلویانو پراخه لاریونونه وکړل او ډېر دولتي تاسیساتو ته یې زیان ورساوه. هغه ګواښ کړی وو چې که بیا ونیول شي، حکومت به بیا د ولس له ورته غبرګون سره مخ شي.
