د ایران ولسمشر ابراهیمي رییسي د دغه هېواد ځينو چارواکو ته لارښونه کړې چې له افغانستانه د ایران د حقابې مسئله په جدي توګه تعقیب کړي. د ایران ولسمشر د دغه هېواد د بهرنیو چارو وزیر، د انرژۍ وزیر او د دغه هېواد ځانګړي استازي ته لارښوونه کړې چې د افغانستان له هلمند سینده د ایران د حقابې مسئله تعقیب کړي. د افغانستان لپاره د ایران ځانګړي استازي حسن کاظمي قمي له یوې ایراني رسنۍ سره په مرکه کې ویلي، چې د ایران د حقابې موضوع یوه قانوني مسئله ده او افغانستان یې باید عملي کړي. بل خوا، د اوبو او انرژۍ وزارت وایي، چې د ۱۳۵۱ لمریز کال د تړون پر بنسټ، د ایران د حقابې ورکړې ته ژمن دی. د کابل او تهران ترمنځ د هلمند سیند د اوبو تړون په ۱۳۵۱ لمریز کال کې د وخت د لومړیو وزیرانو موسی شفیق او امیرعباس هویدا ترمنځ لاسلیک شو. د دغه تړون له مخې، افغانستان په نورمال اوبیز کال کې په هره ثانیه کې ایران ته ۲۶ متر مکعبه اوبه ورکوي.
